| ПРАГРАМА
| Стары ўтульны Заслаўе — адзін з самых старажытных гарадоў Беларусі, яму больш за 1000 гадоў. Пра падзеі, якія папярэднічалі яго з'яўленню, апавядаюць восем старажытных летапісных збораў! Падчас ЭКСКУРСІІ ПА ГОРАДЗЕ пазнаёмімся з яго старажытнай гісторыяй. З Заслаўем звязаны імёны многіх выдатных людзей беларускай (і не толькі!) гісторыі — полацкая князёўна Рагнеда, вялікі князь кіеўскі Уладзімір Святаславіч, полацкі князь Ізяслаў. Бронзавую постаць князя Ізяслава мы ўбачым на цэнтральнай плошчы горада. Шматвяковая мінуўшчына прадстаўлена тут помнікамі гісторыі, археалогіі і архітэктуры: здалёк віднеецца велічная вежа СПАСА-ПРААБРАЖЭНСКАЙ ЦАРКВЫ — найбольш выразнага з помнікаў абаронна-культавай архітэктуры Рэнесансу Беларусі. Першапачаткова храм быў узведзены як кальвінскі збор у 2-й палове XVI стагоддзя пасярод умацаванага бастыённага замка. Замак не захаваўся, але магутныя яго валы вакол храма ўражваюць сваёй моцай. На Рынкавай плошчы Заслаўя ўбачым і каталіцкі храм — прыгожы касцёл Раства Дзевы Марыі, пабудаваны ў стылі позняга барока ў 1774 г.
Усплёск цікавасці да горада ў апошні час звязаны з новым мілым музеем, прысвечаным маляваным дыванам. Народнае мастацтва маляваных дываноў ці "маляванак" характэрна для многіх народаў, яны былі неад'емнай часткай народнага жылля. У нашу экскурсію ўваходзіць наведванне МУЗЕЯ МАЛЯВАНКІ, дзе ўбачым калекцыю маляваных дываноў народнай мастачкі АЛЕНЫ КІШ. Яе дываны арыгінальныя па сюжэтах, не маюць аналагаў у беларускім народным мастацтве. Яе імя згадваецца ў "Сусветнай энцыклапедыі наіўнага мастацтва", дзе прадстаўлена інфармацыя пра 800 самых вядомых сусветных мастакоў-прымітывістаў. Творчая спадчына Алены Кіш адносіцца да лепшых узораў творчага самавыяўлення беларускага народа. У музеі ўбачым таксама дываны прафесійнага мастака ЯЗЭПА ДРАЗДОВІЧА, якія з'яўляюцца прыкладам мастацкага сінтэзу народнага і прафесійнага мастацтва.
Далей едзем да месца нараджэння беларускага песняра Янкі Купалы — у ВЯЗЫНКУ. Пабачыўшы краявіды Вязынкі разумееш, чаму Ясь Луцэвіч пачаў пісаць вершы. Маляўнічая рэчка, адлюстраванне дрэў у вадзе, узгорыстыя і лясістыя ваколіцы з'яўляюцца прыроднай экспазіцыяй паэтычнага гісторыка-культурнага ландшафту… На плошчы ў 21 га знаходзяцца каларытныя жылыя і гаспадарчыя пабудовы з прадметамі побыту, малыя архітэктурныя формы, жывапісныя пейзажы, якія нібыта сышлі са старонак твораў паэта. Тут усё дыхае паэзіяй! Наведванне МУЗЕЯ ЯНКІ КУПАЛЫ. У сенцах і пакоі, дзе жыла сям'я Луцэвічаў узноўлены тагачасны інтэр'ер. Атмасферу даўняга побыту ствараюць аўтэнтычныя рэчы канца ХІХ — пачатку ХХ стагоддзя, сабраныя ў ваколіцах Вязынкі. Кожны экспазіцыйны комплекс суправаджаецца паэтычнымі радкамі Янкі Купалы і фрагментамі яго аўтабіяграфічных лістоў. Пасля экскурсіі запрашаем на "ВЯЧОРКІ" — даўні звычай, які так любіў Янка Купала. Вы зможаце паўдзельнічаць у народных гульнях, пачаставацца травяной гарбатай…
ФАЛЬВАРАК РАКУЦЁЎШЧЫНА — былая сядзіба У. Лычкоўскай. Улетку 1911 гады тут спыняўся паэт Максім Багдановіч; тут ён напісаў два цыклы вершаў і дзве паэмы "У вёсцы" і "Вераніка". У 1977 годзе ў Ракуцёўшчыне былі ўсталяваныя два валуны з памятнымі надпісамі, пазней беларускімі пісьменнікамі быў пасаджаны мемарыяльны "Максімаў сад" — больш за 70 дрэў. А зараз тут працуе МУЗЕЙ МАКСІМА БАГДАНОВІЧА. У музейным комплексе адноўлена планіроўка сядзібы дробнапамеснага шляхціца канца XIX стагоддзя. Спачатку наведаем ДОМІК АРАНДАТАРА, дзе ўлетку 1911 г. жыў М.Багдановіч. У гэтым доме, дзе, як сцвярджаў сам паэт, вельмі добра пісалася, экспанаты распавядаюць пра адзін з самых творча насычаных перыядаў жыцця паэта! У ДОМЕ ГАСПАДАРА ўзноўлены інтэр'еры гасцёўні, кухні, дзіцячага пакою. Для адлюстравання тагачаснага жыцця выкарыстаны аутэнтычныя прадметы мэблі і побыту. А ўявіць сабе жыццё беларусаў, "поўнае штодзённага клопату", можна пры наведванні ГУМНА, дзе ўбычым розныя прылады працы селяніна. А саламяны дах гумна аж блішчыць на сонцы!
Накіроўваемся ў Маладзечна. Спынімся на хвілінку ля ПОМНІКА СТАРАВІЛЕНСКАМУ ТРАКТУ, усталяванаму каля дарогі ля вёскі Мясота. Помнік — кампазіцыя з чатырох валуноў ў гонар вядомых людзей, якія праязджалі па гэтым старадаўнім тракце. Мноства дарагіх кожнаму беларусу імёнаў мы прачытаем тут...
Агляд МАЛАДЗЕЧНА пачнем з АБЕДУ. Пасля пазнаёмімся з гэтым горадам, якому больш за 600 гадоў (першая згадка ў 1388 г.). У XV стагоддзі тут быў пабудаваны Маладзечанскі замак, які праіснаваў да сярэдзіны XVIII ст. — да сёння засталіся замкавыя валы. Горад быў важным цэнтрам на гандлёвым Старавіленскім шляху з Мінска ў Вільню. З XVII стагоддзя ўладальнік Маладзечна — канцлер ВКЛ Леў Сапега, а з пачатку XVIII стагоддзя — род князёў Агінскіх. Увесну 1814 года ў спадчыну палац атрымаў кампазітар МІХАЛ КЛЕАФАС АГІНСКІ. Знакамітага земляка шануюць тут: мы ўбачым помнік М. К. Агінскаму; яго імем названа музычнае вучылішча. У пачатку 70-х гадоў XIX стагоддзя эканамічнае жыццё мястэчка ажывіла будаўніцтва Лібава-Роменскай чыгункі, якая звязала беларускія губерніи з партамі Балтыйскага мора і Ўкраінай. Убачым будынак чыгуначнага вакзала ў стылі "мадэрн". Чорная старонка гісторыі Маладзечна — Вялікая Айчынная вайна. У ліпені 1941 года тут нямецкія акупанты ўчынілі лагер для савецкіх ваеннапалонных. Праз гэты лагер, да чэрвеня 1944 года, прайшло звыш 80 тысяч чалавек, больш за 33 тысячы з іх загінулі. Праект Мемарыяльнага комплексу "ШТАЛАГ-342" распрацаваў архітэктар Леанід Левін, аўтар "Хатыні". Комплекс уяўляе сабой стылізаваны барак для ўтрымання зняволеных і пакідае моцнае ўражанне...
Сеняшні дзень Маладзечна — сучасная забудова, тэатры, пешаходныя вуліцы, паркі. Знакаміты лялечны тэатр "Батлейка" заўседы мае аншлагі. А ПАРК ПЕРАМОГІ — і прыгожы, і адзін з самых вялікіх у нашай краіне. Яго архітэктурнай дамінантай з'яўляецца амфітэатр — галоўная пляцоўка Нацыянальнага фестывалю беларускай песні і паэзіі, які праводзіцца ўжо больш за 30 гадоў.
| |
| |
Кошт экскурсіі, бел. руб.:
|
Кошт экскурсіі для 1 чал.
|
119
|
109
|
| |
| |
Працягласць экскурсіі: 200 км, 9 гадз
Месца пачатку экскурсіі: 9.00, Мінск, пр. Незалежнасці 31-А, дом-музей РСДРП (пл. Перамогі)
Месца заканчэння: Мінск, пр. Незалежнасці 31-А, дом-музей РСДРП (пл. Перамогі)
| |
|
|
