Виаполь - белорусский туроператор

Галоўная / Карпаратыўныя і школьныя экскурсіі па Беларусі / Карпаратыўныя экскурсіі па Беларусі на 1—2 дня /

Бенефіс Знаўцы з Глебам Лабадзенкам: "Мова Нанова запрашае да Усяслава Чарадзея"

Бенефіс Знаўцы з Глебам Лабадзенкам:
"Мова Нанова запрашае да Усяслава Чарадзея"

Маршрут 6.19: Святая гара — Волма — Вялікія Навасёлкі — Юцкі — Гарадзішча — музей-сядзіба "Стары Менск"

Славутыя асобы Беларусі — знаўцы гісторыі, культуры, архітэктуры, літаратуры, яны ж акцёры і заўзятыя вандроўнiкi, фотамастакі і аўтары нашумелых бэстселераў — раскажуць Вам пра тое, чаму яны прысвяцілі свае даследаванні, чаму аддалі сваё сэрца, часам — нават ўсё жыццё... Гэта не традыцыйная экскурсія, а — Бенефіс Знаўцы. Скарочана — "БЗ", а калі па першых літарах, то бэ-зэ. Так-так, калі заўгодна, хоць і насуперак арфаграфіі, але па сэнсе — лёгкае пірожнае, згатаванае рукою сапраўднага майстра як твор мастацтва! Экскурсія — дэсерт!

ПРАГРАМА

Зноўку едзем з Глебам Лабадзенкам labadzenka.by — журналістам, паэтам, блогерам, даследчыкам радзівілаўскіх фатаграфій і выкладчыкам самых масавых у свеце курсаў беларускай мовы "Мова Нанова" "Мова Нанова", аўтарам цудоўнай кнігі моўных малюнкаў "Дзіцячая заМова".

Дарога прывядзе нас да СВЯТОЙ ГАРЫ — самай высокай кропкі Беларусі, сучасная назва якой зусім не кладзецца на гэты тэкст. У ВОЛМЕ ўбачым сядзібу Ваньковічаў: сядзібны дом ХІХ ст., збудаваны ў стылі класіцызму, і афіцыну.

Пазнаёмімся з сядзібай Кастравіцкіх ў ВЯЛІКІХ НАВАСЁЛКАХ і пагаворым пра знакамітых людзей гэтага роду. Затым едзем у ЮЦКІ — помнік прыроды рэспубліканскага значэння "Юцкоўскія крыніцы" — вельмі прыгожы ледніковы каньён, месца масавага паломніцтва па чыстую і гаючую ваду.

А скончым экскурсію ля вытокаў летапіснага Менска — на рацэ Менцы пад велічнымі валамі гарадзішча ХІ стагоддзя ў аднаіменным пасяленні ГАРАДЗІШЧА. Супрацьстаўленне войска Полацкага князя Ўсяслава Чарадзея і войска Кіеўскіх князеў Яраславічаў ў сярэдзіне ХІ стагоддзя знайшло адлюстраванне ў хроніцы "Аповесць мінулых гадоў" і стала першым успамінам пра горад Менск — пад 1067 годам. Валы Гарадзішча добра захаваліся, з іх вышыні (а гэта 9-ці павярховага дому вышыня!) пад аповед Глеба Лабадзенка можна сабе ўявіць ход той бітвы! А ўнікальныя артэфакты Х-ХІ стагоддзяў (знаходкі археалагічных раскопаў) зробяць жыцце людзей таго часу больш зразумелым. Цяпер Вы будзеце ведаць, дзе пачаўся наш Менск! Ну і раскрыем інтрыгу пра пана Пішчалу.

У Гарадзішчы пад старадаўнімі валамі знаходзіцца і каларытная сядзіба-музей "СТАРЫ МЕНСК" (ўваходныя квіткі за дадатк. плату); экскурсія ў ім суправаджаецца відэашэрагам на вялікім экране — усё лёгка, цікава і зразумела! Вы ўбачыце 500 экспанатаў X-XI стагоддзяў: прадметы побыту, ўпрыгажэнні, зброю, тысячагадовыя крыжы, многія з іх патрымаеце ў руках — унікальная магчымасць дакрануцца да 1000-гадовай даўніны. Вы паглядзіце на вялікую мадэль Мінскага замка XI стагоддзя і зробіце сэлфі з Усяславам Чарадзеем у вязніцы. Вы ўбачыце самую старую шахматную фігуру ва Усходняй Еўропе — каня пачатку XI стагоддзя; выяву Крыжа Еўфрасінні Полацкай у натуральную велічыню. Ўладкаваная з густам сядзіба — арыгінальны міні-музей матэрыяльнай культуры народа. Пад смачныя каву і духмяны чай тут можна паглядзець невялікі фільм пра гісторыю Мінска.

Кошт экскурсіі, бел. руб.:

	Пры групе 40 чал.	Пры групе 26 чал.	Пры групе 18 чал.
Кошт экскурсіі для 1 чал.	40,10	49,20	66,10

Кошт экскурсіі ўключае:
    • аўтобус туркласса
    • экскурсійнае абслугоўванне
    • фірмовыя сувеніры

Дадаткова аплочваецца:
    • уваходны квіток у музей "Стары Менск"
    • кава і гарбата з печывам
    • абед

Працягласць экскурсіі: 150 км, каля 9 гадзiн

Месца пачатку экскурсіі: ад Вашай арганізацыі (ці пазначце іншае месца)
Месца заканчэння: па Вашым запыце

Глядзіце ўсе фота